Der liewe Läit, wat war dat scheen, mo nommo uff de Beller Maat zu gehn. Äich war jo gefiehlt hunnert Johr nimme do, äich sinn nämisch ehrlich gesaat nit so de Maatgänger.
Die viele Läit, dat Gewusel und Geplerre is mer immer ganz schnell ze viel. Awa äich muss saan, gista war dat mo nommo rischdisch scheen. Ma trifft Gott un die Welt, entdeckt witzische Sache for die Kich un de Gaarde – naderlich alles Krom, dä wo ma nit broucht – un kann scheen gemitlich unna de Bääm hugge und maie. Wunnerbar.
Besunnerscht gut gefalle mer jo immer die Maatschreier. Wat die plärre kinne! Kaafe dun äich bäi däne jo immer nix, awa zugugge is zu scheen. Un gista is mer dobäi aach ingefall, dat äich als Kind schunn immer vor däne gestann honn, mit große Aue, un mäich klään gemach un geduckt honn, dat se mäich bloß nit aanschwätze iewa er laudes Mikrofon, wat se immer umhänge honn. Wat mache die als bleede Witze iewa die Läit, die dann en vullgepackt Tuut schnappe. Un dann packe se als noch en Wurscht meh rin, weil die fott misse.
Ach, noch ebbes wullt äich jo verziele: Die Kierelschorze honn äich ma nadeerlich aach anguggt gista. Nor kaaft hon äich kän. Wissta aach warum? Äich honn nämisch awäile schunn dräi Stick dehääm. Nodäm öich dat letzt Johr geschrieb hat, hon nämisch ganz viel Läit an mäich gedaacht, un mer än geschnekt. Scheen, gelle?